Como faciamos e como facemos para producir alimentos
Datos:
Tipo de actividade:
paseo guiado (dificultade baixa; apto para todas as idades)
Día:
20 de febreiro de 2022, domingo.
Hora:
de 11:00 a 13:00 horas.
Punto de saída e de chegada:
Local da Asociación Cultural de A Mámoa de Luou (A Igrexa, 18)
Somos o que comemos? Ou iso din…
Nun tempo, a nosa alimentación condicionaba, non só o noso corpo, senón todo o territorio. A paisaxe agrogandeira era un fiel reflexo do que comiamos, máis tamén de como nos relacionabamos.
Moito cambiou o conto nas últimas décadas…
A través dun pequeno paseo pola parroquia de Luou faremos unha viaxe no tempo para coñecer, nas voces das nosas maiores, como faciamos e como facemos para producir alimentos na nosa contorna e, ao mesmo tempo, valorar que relación tiveron e teñen todos estes cambios co medio ambiente.
Pero non só iso… O paseo pretende ser tamén un espazo no que xogar, compartir as vivencias e coñecementos das participantes e, por suposto, cantar! Vinde coas gorxas ben afinadas, que as pandereteiras da Mámoa traerán algunha copla para completar a xornada!
Esperámosvos a todas e todos.
